.
Parmarija siciliana raccolta da Giuseppe Pitrè
.
Comu nasci’ lu Bamminu, S. Giseppi, vidiennu ca lu picciliddu murìa di fridda, pinsà’ di’jiri a circari tantìcchia di focu pi scarfari o Signiruzzu (1). Niscì’ di la gratta e ij’ ‘nti tri picurara, chi eranu jintra una mànnira (2). Sti tri picurara avianu un cani, chi a cu’ trasìa ddà jintra lu squartariava a muzzicuna (3). S. Giseppi trasì’ e lu cani ‘un cci fici nenti.
Li picurara vidiennu daccussì, dissinu tra d’iddi: – «E chi havi stasira stu cani ca ‘un cci dici nenti a stu vecchiu?…»
Poi comu lu vittiru tràsiri, cci dissiru: – «Chi vuliti, bon vecchiu?»
S. Giseppi cci rispunnì’: – «Vurrissi tantìcchia di fuocu». –
«E unn’è chi l’aviti a mettiri?» cci spijaru li picurara;
e S. Giseppi cci prisintà’ la punta di lu so cappuottu; dici: – «Ccà».
– «Ma ‘un s’abbrucia?» cci dissiru chiddi;
e S. Giseppi: – «Avoglia» (4).
Li picurara hannu pigliatu lu fuocu, e cci l’hannu misu ‘nti lu cappuottu.
S. Giseppi si nni ij’; e li picurara pinsaru tra iddi: – «Aviti a vìdiri comu s’havi a ‘bbruciari lu cappuottu stu vecchiu!…» Poi quannu vittiru ca lu vecchiu nun s’abbrucia’, e lu cani ‘un abbajà’, pinsaru ca chistu auvia essiri corchi uomu prudigiusu. ‘Nti mentri cumparì’ un Ancilu, e cci dissi ca avia nasciutu lu Misia, e allura li picurara si pirsuasiru di la cosa, e jeru a purtari ricotta, cuniglia e palummi a lu Signiruzzu.
Da FIABE E LEGGENDE POPOLARI SICILIANE – Giuseppe Pitrè – Donzelli
FOTO: Rete
NOTE
1 Per riscaldare il Signoruzzo (il Bambino Gesù).
2 Uscì dalla grotta e andò da tre pecorai, che erano dentro una mandra.
3 (II cane) stracciava a morsi (sbranava) chi entrava (entrasse) lì dentro (la mandra).
4 Avoglia, non fa nulla.
5 Raccontata da Antonio Barragato.